Bu gün futzal üzrə Azərbaycan Yüksək Liqasında 2022/2023 mövsümünə yekun vurulub.
Həlledici final qarşılaşmasında "Neftçi İdman Klubu" və "Araz Naxçıvan" komandaları üz-üzə gəliblər. Bakı İdman Sarayında təşkil olunan və gərgin mübarizə şəraitində keçən matçda təmsilçimiz böyük əzmkarlıq nümayiş etdirsə də, sonda güclü rəqibinə - turnir cədvəlinin liderinə 1:4 hesabı ilə məğlub olub və Azərbaycan çempionatının gümüş medalına layiq görülüb. "Araz Naxçıvan" Azərbaycan çempionu olub.
"Baku Fire" komandası isə bürünc medala sahib olub.
Sonda mükafatlandırma mərasimi keçirilib. Mövsümü ilk 3 pillədə başa vuran komandalar mükafatlandırılıb.
Mükafatları Azərbaycan Futzal Federasiyasının prezidenti, AFFA İcraiyyə Komitəsinin üzvü Zaur Axundov, AFFA-nın baş katibi Sərxan Hacıyev və "Neftçi İdman Klubu" İB-nin idarəetmə aparatının rəhbəri Sadıq Sadıqov təqdim ediblər.
